Հայաստանի հավաքականով հետաքրքրվում է Ադիդասը

Հայաստանի հավաքականն օրերս ՖԻՖԱ-ի վարկանիշային աղյուսակում հայտնվեց 44-րդ հորիզոնականում, ինչը ռեկորդային ցուցանիշ է հայկական ֆուտբոլի համար։ ArmSport.am-ի այն հարցին, թե ինչ կարող է տալ այս հորիզոնականը Հայաստանին, ՀՖՖ նախագահ Ռուբեն Հայրապետյանը պատասխանեց. «Ուրախալի փաստ է, որ մեր հավաքականը 44-րդն է։ Ցանկացած հայ մարդ իրեն լավ կզգա՝ հավաքականին տեսնելով այդ հորիզոնականում։ Երբ ես դարձա ֆեդերացիայի նախագահ, հավաքականը շատ ավելի ցածր տեղում էր, իսկ այժմ ինձ համար հաճելի է, որ 44-րդ տեղում ենք։ Ի՞նչ կարող է տալ մեզ այս տեղը. նախ, պետք է պահպանենք այս դիրքը և գնանք առաջ, որ հաջորդ ընտրական փուլի վիճակահանությունում լինենք բարձր զամբյուղում։ Այնուամենայնիվ, ներկայիս ֆուտբոլում դա մեծ նշանակություն չունի, քանի որ մենք սկսել ենք ցածր զամբյուղից՝ թեև ետնապահ չէինք։ Բացի այդ, Հայաստանի հավաքականի նկատմամբ հետաքրքրությունն է մեծացել։ Օրինակ, Ադիդասից հովանավորչության առաջարկություն ենք ստացել։ Դա նաև բարձր վարկանիշի արդյունք է»։